bitcoin，講到尾都只係一種貨幣。要講信唔信得過一種貨幣，真係可以有排講。一般人會覺得美金，人民幣信得過，因為美國同中央政府既政權穩固，有政府支持。咁港紙呢？用個極端例子，聽日阿爺唔高興，話唔會再承認港紙，最多用人仔一蚊換你地啲一千蚊啲香港癈紙。咁，港紙，同好多用易貶值細國家既銀紙一樣，其實都信唔過。之但係相反黎講， bitcoin 係無任何國家或政權背後支持（唔講陰謀論啦），只要有互聯網存在，bitcoin 就會存在，唔需要擔心邊個國家既貨幣安唔安全。再者，因為 bitcoin 認“簽名”唔認人，就算你有價值 HKD 一百萬既 bitcoin，你都唔需要銀行，你可以放喺手提電話，可以放電腦。你只要管好你既"簽名"，你既 bitcoin 就安全。當然，你好聰明，知道電話電腦太容易俾人 hack 唔安全，咁你可以將你既簽名埋落地，放保險箱，或者你用個腦記住，有另外一百種方法去保管你既簽名。總之， 一日無人 hack 倒你個簽名，就無人郁倒你啲錢，百份百安全，連政府都無辦法。咁 bitcoin 仲信唔過？
其實亦係呢個原因，所有國家都無任何方法去攞走或凍結你既 bitcoin 戶口，亦阻止唔倒你 bitcoin 既交易，對於黑錢既交易完全無晒符，所以唔係所有國家 bitcoin 都合法。好彩香港，用 bitcoin 仍然合法，雖然我唔知係因為香港政府真係胸㯲廣闊，定只係完全唔知原來 bitcoin 係咁難控制。
其中一個 bitcoin 最大既賣點，就係非常平宜既交易成本(transaction cost)。傳統既 transaction，例如我用信用卡買野，睇落簡單，但內裏既交易成本非常之多。商戶(merchant) 要聯絡佢地既銀行，佢地既銀行要聯絡 VISA/Master, VISA/Master 再聯絡你既發卡銀行，一步一步咁確認信用卡無被盜用，未過期，未過額等等，所有呢啲動作都係交易成本。所以 VISA/Master 需要 charge 商戶 4-5% 既交易費用。當然，暴利係佔一大部份。
bitcoin 相對地，因為無銀行喺中間，交易只係需要電腦間一連串既運算，所以交易成本係非常之低。亦無貨幣換算既麻煩。例如我喺香港用開 bitcoin, 我要買美國既野或轉錢俾我美國既朋友，只要對方既商店收 bitcoin, 我用手機或電腦一個 e-mail/whatsapp/wechat ，對方就收倒錢。對方要用 bitcoin 換美金換其他貨幣係佢既自由。當然，bitcoin 既普及同流通係先決條件，佢啲 bitcoin 對唔返美金或當地流通貨幣都無用。
遲啲我再講下點保管你既“簽名”（ 其實只係一條 ECDSA key）。點解 bitcoin 好似咁易唔見，咁多騙案。其實都只係源於 bitcoin 既技術涉及一啲加解密(cryptography/algorithm)既原理，一般人都未必理解。下篇講講。要了解加密學，其實唔難。
