Wednesday, May 6, 2015

bitcoin 衍生工具

喺我喜愛 bitcoin 既同時,又發現好多 bitcoin 公司無啦啦執咗。www.alitobit.com, suppose 係 bitcoin ATM 公司。http://bitcoinnews.hk/ 一個比特幣既資訊網, last update 都已經係 2014 年既 4 月。一盤冷水臨落黎,都唔好話唔灰。


香港人鐘意炒賣,似乎喺 2014 年初炒爆咗 bitcoin 之後,所有人同公司都離 bitcoin 而去。咁又係。香港人買 bitcoin 既我諗大部份都係炒家,當佢股票咁炒。炒燶咗咪離場,以後都唔想多望一眼。


有趣既大家可以望多一張圖。雖然 bitcoin 既幣值係炒爆咗,但 bitcoin 既 transaction 則與日俱增。即係越黎越多人用。原因好簡單。Bitcoin 係一隻為 internet 交易而設既貸幣,當一隻貸幣被炒賣,隻貸幣其實失去咗佢既交易功能。試諗諗如果你手上有一隻貸幣,今日你唔用,聽日就會升值,可以買倒更多既野,你仲捨唔捨得用?倒轉如果隻貸幣日日跌,你又會寧願聽日先買入啦,聽日跌咗又可以買多啲。永無止境咁等,就阻礙咗交易。所以而家慢慢  bitcoin 既滙價 settle down 之後,先開始發揮佢既最大潛能,就係低成本交易。

我暫時所見,香港既所謂 bitcoin startup 其實都好無創意。黎黎去去都係 bitcoin ATM 機,賺個 spread 。咁就慘啦,而家流量咁低,生意仲衰過樓下間 RMB 找換店。流量少,找換自然少,賺唔倒錢就唯有加大個買賣差價,買賣差價大人地自然更少去你到買賣,咁就好容易執笠喇。其實只要明白 bitcoin 既成功其中一個主要原因係 low transaction cost, 但 bitcoin ATM 既 spread 有成 10%, 即我一買一賣都唔見咗 10%,仲貴過經銀行滙錢,本未倒置咗件事,試問仲有咩人會用呢?

香港身為國際金融中心,竟然無人會為 bitcoin 創立金融服務?bitcoin 由始至終都只係錢,可以設立 bitcoin 銀行,你存 bitcoin 入黎,我俾息你。可以做 bitcoin 借貸,bitcoin 期貸,期權所有衍生工具。香港政府如果想幫助香港既創意科技,更加可以立法監管呢啲 bitcoin 金融機構,監管佢地要某啲有頭有面既人負責,唔可以就咁偷晒客戶啲 key(錢)然後走佬。目標係令全世界既 bitcoin 用家都覺得香港係唯一用 bitcoin 用得有保障既地方,do something good for the world ,咁生意就自然黎啦。

我知,你又話我喺度發夢。係囉,呢個世界有 internet, facebook, google 之前,講呢啲 concept 既人都係發夢架啦。然後你又問,點解香港無 facebook 無 google 咁既公司?